उर्लाबारी । पूर्वी मोरङकै उत्कृष्ट निजी विद्यालयको रुपमा स्थापित सप्तकोशी अंग्रेजी बोर्डिङ सेकेण्डरी स्कुल ३१ औं वर्ष पुग्दै गर्दा आफ्नो बेग्लै पहिचान बनाउन सफल भएको छ । उर्लाबारी– ४ स्थित सो विद्यालयले धेरै अभिभावक र विद्यार्थीको मन जित्दै आफ्नो बेग्लै पहिचान स्थापित गराउन सफल बनेको हो ।

उक्त विद्यालयले शनिबार ३१ औं वार्षिकोत्सव तथा अभिभावक दिवस भब्यताको साथ विविध कार्यक्रमसहित सम्पन्न गरेको छ । विद्यालयका संस्थापक÷प्रिन्सिपल लेखनाथ भट्टराईको अध्यक्षता र उर्लाबारी नगरपालिकाका नगर प्रमुख गंगाप्रसाद खरेलको प्रमुख आतिथ्यतामा सम्पन्न कार्यक्रम भएको थियो । सो अवसरमा वर्ष शिक्षकको रुपमा रमा खतिवडा र मीना थापामगरलाई नगदसहित सम्मान गरिएको छ । यस्तै, उत्कृष्ट अभिभावकलाई पनि सम्मान गरिएको छ ।

विद्यालयले एसइई र एसएलसी परीक्षामा उत्कृष्ट विद्यार्थीलाई पुरस्कृत गरेको छ । गत वर्षको एसइई परीक्षामा उत्कृष्ट हुने स्मृति मिश्र, कक्षा १२ को अन्तिम परीक्षा (एसएलसी) मा उत्कृष्ट हुने विज्ञान संकायका विनयकुमार चोङबाङ र व्यवस्थापन संकायका अंशु खरेललाई पुरस्कृत गरिएको छ । विद्यार्थी र अभिभावकको उल्लेख्य उपस्थिति रहेको कार्यक्रममा संस्थापक÷प्रिन्सिपल लेखनाथ भट्टराईले विद्यालयका गतिविधिका बारेमा जानकारी गराउनुभएको थियो भने ेपाली काँग्रेस उर्लाबारीका नगर सभापति सुरेन्द्र लिम्बू, मिक्लाजुङ गाउँपालिका शिक्षा शाखा प्रमुख काशीनाथ खनालले शुभकामना मन्तव्य राख्नुभएको थियो ।

औपचारिक कार्यक्रम समापन पछि सांस्कृतिक कार्यक्रम गरिएको थियो । जसमा विद्यार्थीहरुले नृत्य, गायन र नाटक प्रस्तुत गरेका थिए । प्राथमिक तहका विद्यार्थीले सन्देशमूलक र माध्यमिक तहका विद्यार्थीले लिम्बू संस्कृतिमा आधारित उत्कृष्ट नाटक प्रस्तुत गरेका थिए । कार्यक्रममा विद्यार्थीहरुले ड्रिल तथा पिटी समेत प्रस्तुति गरेका थिए । तीन दिवसीय वार्षिकोत्सव तथा अभिभावक दिवस कार्यक्रमको पहिलो दिन खेलकुद सप्ताहमा उत्कृष्ट हुने विद्यार्थीलाई पुरस्कृत गरिएको थियो । गत फागुन २ देखि ६ गतेसम्म सञ्चालित खेलकुद सप्ताहमा विविध विधामा प्रतिस्पर्धा गराइएको र ती विधामा उत्कृष्ट हुने विद्यार्थीलाई पुरस्कृत गरिएको हो ।

दोस्रो दिन प्राइमरी ब्लकका विद्यार्थी र अभिभावकको उपस्थितिमा विभिन्न कार्यक्रम सम्पन्न भएको थियो । उक्त कार्यक्रममा नर्सरीदेखि कक्षा ३ सम्मका विद्यार्थीले गीत, नृत्य र नाटक प्रस्तुत गरेका थिए । पुरुष अभिभावकहरुका लागि म्युचिकल चेयर्स र महिला अभिभावकका लागि म्याराथुन डान्स प्रतियोगिता राखिएको थियो । कार्यक्रम सञ्चालन विद्यालय व्यवस्थापन समितिकी अध्यक्ष मिश्र वैजयन्तीले गर्नुभएको थियो ।